AASAASKA NAQSHADEYNTA DAD BADAN ISKA INDHO-TIREEN
Ha kalifin hana kadeedin naftan amaanada ah; haddaad baranayso xirfaddan, fahan adigoo aasaaskeeda ka haysta.
Assalaamu caleykum waraxmatullaahi wabarakaatuh.
Dhalinyaro, soo dhawaada dhammaantiinba. Maanta waxaan idiin deeqsiinayaa xog dhaxalgal ah oo ku saabsan dunida naqshadaynta. Magacaygu waa Abdalla Anas, waxaan ahay naqshadeeye sumadaha (Brand Identity Designer), macallin, iyo nuxur-sameeye (Content Creator) ka tirsan hal-abuurrada madasha boqran ee Saanyo.
Waa Maxay Graphic Design?
Ma is weydiisay micnaha dhabta ah ee xirfaddan? Iska illow in ay tahay uun sawirro la isku keenay.
Graphic Design: Waa farsamo cajiib ah oo isku dubaridda farshaxanka iyo tignoolajiyada si loogu gudbiyo farriin cad. Waxay adeegsataa oo awood u ah:
Muuqaallada: Sawirro iyo isku dhafka elements-ka (walxo bilicda ka qayb qaata).
Qoraalka (Typography): Habaynta xarfaha & qoraaladaba si loo aqrin karo una qurxoonadaan.
Qaababka (Shapes): Goobo, saddex-gees, iyo xarriiqmo macne samaynaya.
Midabada: Saamaynta maskaxeed iyo ka qayb qaadashadda bilic oo ay ku kordhiyaan naqshadda.
Taariikhda: Meesha ay wax kasoo bilaabmeen
Xirfaddan maaha mid hadda dhalatay; waa mid fac-weyn oo soo martay marxalado kala duwan:
1. Xilligii Dhagax-xaradhka (Waagii Hore)
Ka hor intaan la helin warqad iyo qalin, aadanuhu waxay farriimaha ku kaydin jireen godadka iyo dhagxaanta waaweyn. Waxaad arkaysaa sawirro xayawaan iyo calaamado ay dadkii hore u isticmaali jireen isgaarsiinta muuqaalka ah, gaar ahaan ilbaxnimadii hore ee Masar oo caan ku ahayd adeegsiga astaamaha (Hieroglyphics).
2. Kacaankii Daabacaadda (Qarnigii 15-aad)
Isbeddelka ugu weyn wuxuu dhacay markii Johannes Gutenberg uu ikhtiraacay mashiinka daabacaadda (Printing Press). Tani waxay fududaysay in buugaagta iyo macluumaadka si ballaaran loo faafiyo, taas oo dhashay qaab-dhismeedka qoraalka ee aan maanta naqaan.
3. Kacaankii Warshadaha iyo Art Nouveau
Qarniyadii 18-aad ilaa 20-aad, naqshadayntu waxay noqotay mid loo isticmaalo xayaysiisyada iyo tartanka ganacsiga. Waxaa soo baxay iskuulada farshaxanka ee casriga ah.
4. Kacaanka Digital-ka iyo xilliga AI-ga (1980 - Ilaa Maanta)
Waa 1980- aadkii illaa xilliga aan hadda ku jirno. Waxaan dhihi karnaa waa bishii malabka ee xirafdan naqshadeynta hhhhh taas oo aan uga jeedo waa xilliga ugu hawsha yar uguna wanaagsan xirfadan dadka baranaya ama ku shaqaysanayaba sababta oo ah Kumbuyuutarrada iyo barnaamijyada (software) casriga ah ayaa beddelay wax kasta oo adkaa xilliyadii hore, taas oo naqshadaynta ka dhigtay hub ka awood badan sidii hore oo wax lagu dhiso, lagu qurxiyo, laguna tartamo.
Waxaa xusid mudan, sanadkan aan ku jirno, in dad badan oo naqshadaynta rajo ka qabay ay niyad-jab ka muujiyeen soo bixitaanka AI-ga (Garaadka Gacan-ku-samayska ah) hhhhhh! In kasta oo laga yaabo in aad ka naxdo isbeddelkan, haddana xaqiiqadu waxay tahay in AI-gu uusan ahayn cadow, balse uu yahay marxalad kuu tilmaamaysa sida ay wax walba uga fudud yihiin xilligii hore. Waa qalab loogu talagalay in uu caawiyo hal-abuurka qofka ee Alle ku abuuray haduu ka shaqaysiiyo, ee maaha mid beddelaya maskaxda iyo dareenka uu abuuri karo naqshadeeyaha.
Gunaanad
Xirfaddan maaha mid iska caadi ah; waa luuqad caalami ah. Haddii aad si sax ah u barato, waxaad gacanta ku haysataa furaha guusha adduunka tartanka ku dhisan.
Qormadeenna koowaad ee aan ku baahinayno Saanyo.com halkaas ayay inoogu joogtaa. Wixii aan gartay waa waafajin Alle, wixii aan gafayna waa aqoon-yarida naftayda iyo daldalooladayda shaydaankana kama kama maqna meesha. Ilaahay ha naga cafiyo dambigeena dhammaanteenba.
Jazaakumullaahu Khayran. Aan ku wada sallino xabiibkeena Muxammad (CSW). Allahumma salli wa sallim calaa sayyidinaa Muxammad.